Номин-Эрдэнэ 
Монголын Оюуны Өмч Хамгаалах Холбоо (МОӨХХ) Монголын Үндэсний Худалдаа Аж Үйлдвэрийн Танхим (МҮХАҮТ)-ын шинээр томилогдсон Гүйцэтгэх захирал А.Амартөгс, патент, барааны тэмдэг, газар зүйн заалтын газрын дарга С.Дүүрэнжаргал нартай уулзаж, холбооны үйл ажиллагаагаа танилцуулах, оюуны өмчийг эдийн засгийн эргэлтэд оруулах, бизнесийн орчинд зохиогчийн эрхийг хамгаалах чиглэлээр санал солилцох, уулзалтыг зохион байгуулав /2025.03.13/
Уулзалтаар:
1/ Цахим орчин дахь зохиогчийн эрхийн зөрчил нэмэгдэж буй нь бизнесийн шударга өрсөлдөөнд сөргөөр нөлөөлж, оюуны өмч бүхий бүтээгдэхүүний зах зээлийн үнэлгээг бууруулж байгааг онцлов. Зохиогчийн эрхтэй контент, программ хангамж, судалгаа, инновац, бүтээлүүдийг хууль бусаар ашиглах явдал газар авснаар бизнесийн үнэлгээ буурч, шударга өрсөлдөөн алдагдаж байна. Энэ нь зөвхөн уран бүтээлчдэд төдийгүй бүхэлдээ бизнесийн салбарт сөрөг нөлөө үзүүлж байгаа талаар бизнес эрхлэгчид, уран бүтээлчид ихээхэн гомдолтой байгааг уулзалтаар хөндлөө.
Мөн цахим орчинд гарч буй зохиогчийн эрхийн зөрчлийг улсын байцаагч Зөрчил шалган шийдвэрлэх тухай хуулийн дагуу 58 хоногийн хугацаанд хянаж, шийдвэрлэдэг нь цахим орчны онцлогт тохирохгүй байгааг уулзалтад оролцогчид хэлэлцэв. Секундын хурдаар хэмжигдэж буй цахим орчны зөрчлийг удаан хугацааны шалгалт, хяналтын тогтолцоогоор шийдэх нь үр дүнгүй, зөрчлийг таслан зогсоож чадахгүй байгаа нь хамгийн том асуудал болж байна. Мөн торгуулийн хэмжээ бага учраас хариуцлагын тогтолцоо хангалтгүй, хууль бус үйлдлийг давтах нөхцлийг бүрдүүлж байна.
2/ МОӨХХ нь оюуны өмчийн эрхийг хамгаалах чиглэлээр олон улсын туршлагыг судалж, хэрэгжүүлэх ажлын хүрээнд Солонгос-Монголын хамтарсан хэлэлцээрт өөрсдийн саналыг хүргүүлэн, хэлэлцүүлгүүдэд идэвхтэй оролцож байна.
МОӨХХ болон МҮХАҮТ-ын хамтын ажиллагааны чиглэлүүд:
Оюуны өмчийн үнэ цэнийг нэмэгдүүлэх, бизнес эрхлэгчдэд мэдээлэл өгөх хамтарсан уулзалт, хэлэлцүүлэг зохион байгуулах;
Зохиогчийн эрхийн зөрчил, хууль бус ашиглалтын эсрэг хяналтын тогтолцоо бий болгох;
Цахим орчны зохиогчийн эрхийн хамгаалалтыг сайжруулах, хяналтын систем хөгжүүлэх;
МОӨХХ болон МҮХАҮТ хамтран бизнесийн орчинд оюуны өмчийн үнэ цэнийг нэмэгдүүлэх, зохиогчийн эрхийн зөрчлийг бууруулах, хууль эрх зүйн орчныг сайжруулах чиглэлээр шийдвэр гаргачдад нэгдсэн байдлаар санал санаачлага хүргүүлэх, уулзалт хэлэлцүүлгүүд зохион байгуулах зэрэг ажлуудад "дуу хоолой"-гоо нэгтгэн, хамтран ажиллахад таатай байх болно гэдгээ МҮХАҮТ-ын Гүйцэтгэх захирал А.Амартөгс илэрхийллээ.
Найрсаг дотноор хүлээн авч, бидний саналыг идэвхитэй сонссон А.Амартөгс захиралдаа цаашдынх нь ажилд амжилт хүсье!