Номин-Эрдэнэ 
2024 оны УИХ-ын сонгуулийн дараа Засгийн газрын шинэ бүтэц батлагдаж, Оюуны өмчийн газар Эдийн засаг, хөгжлийн яам (ЭЗХЯ)-ны харьяанд шилжсэн. Энэхүү өөрчлөлтийн гол зорилго нь оюуны өмчийг эдийн засгийн эргэлтэд оруулах, түүгээр дамжуулан бизнес, инновацын хөгжлийг дэмжих явдал байв.
Энэ хүрээнд Монголын Оюуны Өмч Хамгаалах Холбоо (МОӨХХ) ЭЗХЯ-тай албан уулзалт зохион байгуулж, оюуны өмчийг хамгаалах, ашиглах, эдийн засгийн эргэлтэд оруулах чиглэлээр санал солилцлоо. Уулзалтад ЭЗХЯ-ны Хөгжлийн нэгдсэн бодлого, Хөрөнгө оруулалт, Салбаруудын шинэчлэлийн нэгдсэн бодлогын газрын холбогдох төлөөлөл оролцож, цаашдын хамтын ажиллагааны талаар хэлэлцэв.
Оюуны өмч эдийн засгийн эргэлтэд орсноор гарах давуу талууд:
- Шинэ бизнес, гарааны компаниудын өсөлт: Оюуны өмчийн эрхээр баталгаажсан шинэ санаа, технологиуд зах зээлд гарах боломжтой болж, хөрөнгө оруулалт татах, олон улсын түвшинд өрсөлдөх чадвар нэмэгдэнэ.
- Инновац, судалгааны хөгжил: Оюуны өмчийг зөв удирдан, лицензжүүлэх, патентжуулах тогтолцоо бүрэлдсэнээр судалгаа, хөгжүүлэлтийн хөрөнгө оруулалт өсөж, шинэлэг бүтээлүүд нэмэгдэнэ.
- Эдийн засгийн өсөлт, ажлын байр нэмэгдэх: Оюуны өмчийг эдийн засгийн эргэлтэд оруулах замаар шинэ салбарууд хөгжиж, ажлын байр шинээр бий болно.
- Олон улсын зах зээлд гарах боломж: Монголын бүтээгдэхүүн, технологи, брэндүүд олон улсын зах зээлд өрсөлдөх чадвар сайжирч, лицензийн орлого нэмэгдэнэ.
МОӨХХ-ийн зүгээс оюуны өмчийг эдийн засгийн эргэлтэд оруулах, хууль эрх зүйн орчныг сайжруулах чиглэлээр ЭЗХЯ-тай үргэлжлүүлэн хамтран ажиллахаа илэрхийллээ. Талууд ойрын хугацаанд оюуны өмчийн үнэлгээ, цахим систем, зохиогчийн эрхийн хулгайтай тэмцэх, төр хувийн хэвшлийн хамтын ажиллагааг сайжруулах чиглэлээр тодорхой уулзалт хэлэлцүүлгүүдийг зохион байгуулахаар тохиролцов.